أسطورة التشاؤم والتشاؤميين والحزن والوحدة والعزلة سي ارثور شوبنهاور مقودا عليها لأقصى درجة،فاقد الأمل من كلشي معروف حاقد على النسا بزاااف وأول امراة حقد عليها كانت الأم ديالو،ولي قال عليها:لن يذكرك التاريخ سوى أنك أم شوبنهاور،لانها بعد وفاة الواليد ديالو ولي كان كبر منها فالسن بزاف بدات كتجيب الرجال للدار وتخون الواليد ديالو...شوبنهاور ماكان عاجبو داك الستون وكانت هاد هي شرارة الاولة لي كرهاتو فالعيالات،من بعد جمع جوايج وخرج قود من الدار ومابقاش شاف كمارت مو الى يوم وفاتها..مشا كمل قرايتو وحصل على الدوكتوراه وكان كيحماق على الفلسفة ديال"كانط"وقرا الكتوب ديالو وتشبع بالفكر ديالو من بعد ولا تيقري فالجامعة نفسها لي تيقري فيها هيجل،السيد حاقد حتى على"هيجل"بدا تيسب فيه وتيقول للطلبة ديالو أن هيجل غير ترتار وكذاب استغل فلسفة كانط وبغا يستغلها لمصالحو الشخصية،،ولكن باش تنتاقد هيجل خاص يكونو عندك ديال النحاس لان الطلبة هربو عليه وخلاوه بوحدو،هو يزيد يحقد على هيجل والطلبة ولافاك ههه وكان تيقول أنهم دايرين ضدو مؤامرة باغين يطيحوه لأنهم حاسدينو..من بعد قرر شوبنهاور يبعد من الجامعة،ويعيش بقية حياتو فغرفة فواحد الاوطيل 3نجوم هو والكلب ديلو ههه،وبدا تيكتب عصارة أفكارو والفلسفة ديالو لي غالبا كان كينتاقد فيها هيجل والفلاسفة الكبار ديال الألمان بحال كتاب"فلسفة الجامعات"لي قال فيه ان هيجل وآخرين مجرد دجالين ومحتالين كيكذبو على الناس،من بعد ألف كتاب سماه " ( العالم إرادة و تمثل )،وكان من قبل ألف كتاب فالفن سماه نظرية الأبصار والألوان،لكن انتقادو لربابنة الفلسفة خلا ناس يهربو عليه والكتوب ديالو ما تباعش وهادشي زاد قود عليه الحياة بزاف وسخط على كلشي وكانت فلسفتو كلها تشاؤم ودعوة للانتحار والتمرد والحزن والقلق،وهو لي قال:ان اكبر انتصار للانسان هو ان يموت.....يتبع
بقلم : ياسين خال رميسة
