10 اشارة كادل على انك لقيتي توأم الروح

10 اشارة كادل على انك لقيتي توأم الروح :

واخا ديما كاتكون مع عشرانك, فالقهموة. القراية اولا الخدمة, كاينين ناس لي واخدين بلاصة مهمة فقلبك, هادوك الناس لي كاتلقى راحتك معاهم رغم الخلافات, كاضحي باش تريح معهم شوية, فاش كاتقرا هادشي كتفكر فيهم, ولكن بالضبط كاينة واحد الشخصية لي لاعب عليها العنوان, او هاد الشخصية نتا ماعارفش واش كاتمثل ليك فحياتك, واش علاقة عابرة اولا غاتكمل معاها ؟

داكشي علاش فالدرس ديال اليوم غانحاول نوصل ليك بعض الافكار او الاشارات لي كاتاكد انك لقيتي اخيرا توأم الروح ديالك.

نب : في حالة ما كنتي مع شي وحدة او لقيتي ان هاذشي لي مكتوب كتحس بيه مع شي وحدة من غيرها الوغ ماترددش او سير لعند لي غاترتاح معاها, قضيتنا هنا ماعنده تا علاقة بالانانية ولكن واخا تكون هاذي لي نتا معاها دابا هي محتاجاك او نتا مابغيتيتش تخليها حينث غاتجرحها تيق بيا الجرح غايزيد يكبر الا بقيتي معاها, ديفوا كانجرحو الناس بالحب ماشي بالكراهية, او جرح الحب ماكايتنساش على ديال الكراهية, الوغ نرجعو لدرس ديالنا ونبداو بأول إشارة لي هي :

-1 :كاتواصلو بلاما تهضرو بصح.

لي واضح من الجملة انكم كاتهضرو فالخوا يعني فشتى المجالات, فمواضيع تافهة, يإما شي حاجة فالسياسة, فالفيزياء, نفسية, على العلاقات, على كورة, افلام, رحلات الصيف, مشاكل الاصدقاء ديالكم, تاكاتجيو تشوفو تاتلقاو الوقت داز.

المواضيع ديالكم ماكاتحتاجش مقدمات تكفي شي واحد فيكم يبدا جملة لوخر يكملها تاكايدوز الوقت.

-2 :كتحسو بيها فالاعماق.

بدون اسباب, او ماعندكمش تاالجواب ديال سؤال علاش ؟ يكفينا عارفين اننا كانرتاحو وحنا مع بعضنا.

-3: تفاعلات فالهواء.

باختصار عن مقالات علمية قريتهم تاياكدو ان الكائنات الحية كايسيفطو طاقات لي الاجسام ديالنا كايعرفو كيفاش كايصرفوها او هاد الطاقات تقد تكون ايجابية تقد تكون سلبية,

على سبيل المثال : كاتكون غادي تاكايبان ليك شي كلب تايشوف بطريقة غامضة او كاتحس من جهتو بالخوف علاش ؟ بكل بساطة حينثاش هو واخد منك حذر او كايبعث ما يسمى بالطاقة السلبية لي كاترجمها تانتا او كاتبدا تاخد منو الحذر, او ديفوا كاتشوف كلب كاينبح ولكن ماكاتخافش منو حينثاش واخا النباح ديالو نتا حاس بيه بلي ماغاياديكش. القطط كذلك.

اما بالحديث عن الانسان, ديفوا كاتشوف شي واحد ماكاتعرفوش ماكايعرفكش او بلاما يهضر معاك كاتاخد عليه احكام مسبقة يا اما تاتقول هاذاك الشخص ماحملتوش غي هكاك اولا ماحملتوش على الله,او العكس.

او بالحديث عن ضيفة حلقتنا اي الدرية لي راك معاها, كاتحس بلي نتا مرتاح معاها حينث تاهي كاتبادلك نفس الشعور.

-4 : بطريقة عجيبة كتحسو بلي راك على حقيقتك.

بلا حساسيات بلا قيود كاتعبر على حالتك الشخصية و بصراحة كاتعاود على مشاكلك اليومية كاتقد تهضر على طبيعتك, بمعني كاتكون على طبيعتك معاها.

-5: نقاشات بصوت مرتفع .

الأغلبية ديال الناس تايعتاقدو بلي توأم الروح تساوي حياة هادئة مافيهاش صراعات, لي تانفضل نسميها نقاشات, بينما العكس, بحيث أن الدراسات تاتبين أن توأم الروح تايبحث دائما على أنه فاش يوقع شي مشكل, يناقشو معاك, صحيح أنه فغالب الأوقات النقاش تايكون بصوت مرتفع, وهذا تايعني أن العلاقة بيناتكم غادية فمسار تلقائي, أي أنكم حتى فصراعاتكم كاتكونو تلقائيين, باش نوضح هضرتي نبغي نستدل بأقرب الناس ليك, لي هو خوك مثلا, رغم أنكم نتا وخوك كادابزو ديفوا, وكاتغاوتو, وتقدر توصل تا لأنكم تهزو يديكم على بعضياتكم, إلا أنكم فالأخير تاترجعو تهضرو بعد نصف ساعة أو دقائق قليلة, هاذشي نفسو تايوقع ليك مع توأم الروح ديالك, بحيث أن التلقائية ديالكم تاتخليكم تناقشو بصوت مرتفع, فالحين لي تاتحاول فيه هي أنها توجهك, تهضر معاك, باش توصلو لنتيجة, لربما هي تخطي المشكل أملا أنه ماغايتعاودش وتكملو حياتكم, أو إصلاح المشكل باشما يتعاودش وتكملو حياتكم.

-6الاختلاف تايذوب قدام الأهداف المشتركة :

صحيح أنك نتا وتوأم الروح كيما ذكرنا قبل تاتناشقو وتاطيحو فصراعات, وتاتختالفو فمجموعة من النقاط كيلكوسوا هاذ النقاط, إلا أنكم كاتشوفو فنفس الأفق, نفس البعد, نفس الزاوية الهدفية إن صح التعبير, وكاتسهرو بجوج على تحقيق هاذ الأهداف, لي ربما يقدر يكون من بينها الهدف السامي لي هو : السهر من أجل راحة الآخر.
هاذ العدف لي نتا كاتحاول توصليه وتحافظ عليه, ولي تاهيت اطمح توصليه وتحافظ عليه, باش ضمنو لراسكم حياة مستقرة, ولي هي الهدف الثاني من مجموعة الأهداف لي مسطرينهم تجاه بعضياتكم, بدون وعي, تاكاتلقاو راسكم راكم غاديين فتحقيقها.

 7-الشعور بالراحة والرضى :

ذكرت من قبل أنكم كاتسهروا على الراحة ديال بعضياتكم, هنا تانبغي نشير إلى أنكم ماشي وصلتو لهاذ الهدف, ولكن لي تانبغي نشير ليه هو أنكم أثناء المحاولات ديالكم باش توصلو لهاذ الغاية السامية, تاتحسوا بالراحة, هاذ الراحة لي تاتكون متبادلة, بحيث كاتحول وكاتصبح رضى, علاش؟ بكل بساطة حيتاش منين كاتشوف أن الجهد ديالك مامشاش هباء منثورا كيما تانقولو, تاتحس بالرضى, كاتولي تايق فراسك كثر من ما كنت, كاتولي مرتاح وكايذوب داك السطريس لي تايكون فأول لقاء, أولا فبداية العلاقة, فين كان كل واحد فيكم تايحاول أنه يجهد على راسو كتر من لقياس, وهنا تانصحكم أنكم تقراو الدرس : كيفاش مانوقعش فمشاكل مع الساطة؟-

8- المعادلة : sin²(x) + cos²(x) = 1

توأم الروح ديالك رغم الاختلافات وكولشي, كاتحس أنها كاتكملك, كاتحس أنك نت اوياها كاتكلو واحد هنا يمكن تشرشمو الماط وتردو 1+1=1 وهذي دلالة قوية على أنك لقيتي توأم الروح ديالك

9- ديما مزعوط :

رغم المسافة وضيق الوقت والصعوبات وكولشي, كاتلقى راسك أنك كاتبغيها, ونهار على نهار كاتزيد تبغيها, واخا ماتاتشوفهاش واخا فرقاتكوم الخدمة, القراية, لقيتو راسكم نهار تلاقيتو عوتاني باقين على طبيعتكم, الحب باقي ثابت, أو تزاد كتر, هاذي من الدلالات ديال أنكم كاتشكلو ذات وحدة كيما ذكرنا فالاشارة الثامنة

10- الصمت لا يرهبكم :

عنوان غريب لكن فالحقيقة كايهز بزاف ديال المعاني معاه, نعطيك مثال ديال درية يالاه عرفتيها, وفاللقاء بقيتي تاتفكر فاش تهرو شنو تقول, بغيتي تقتل ذاك الصمت, مدابز مع راسك وخايف من الصمت, هاذشي ماكايكونش مع توأم الروح بحيث الصمت ماتايبقاش عندو ذاك المعنى لي كان عندك فراسك, أنك فارغ أو شيء من هاذ القبيل, بل العكس الصمت تايولي شي حاجة ممكن تردها أفونطاج بطريقة مختلفة. 

إعداد : الدون أمين