منين كنت صغير كانت واحد الحاجة سميتها الكاسيط. ماكانش السيدي وماكانش الديفيدي وغيرو. كانت عندنا واحد المسجلة معروفة فداك الوقت سميتها rezing , مسجلة ديال الصالون مع مكبرات صوت كبار من الخشب مصنوعة بجودة وكاتعطي صوت نقي. مع خاصية الراديو بطبيعة الحال. الواليد ماكانش عندو مع الموسيقى في المقابل كانت عندو مجموعة كاسيط ديال لغة المورس وهي لغة ديال الإتصال اللاسلكي,بحكم الخدمة ديالو كان كايحتاجهم. لحسن حظي كانو جوج كاسيطات ديال الموسيقى وسط هاد الاسلحة العسكرية.
جوج كاسيطات كبار! كانضن الفورمة ديال 90 يعني السينتة طويلة وكاتهز بزاف ديال الأغاني. بذون شك شي هدية ديال شي صديق للأب ديالي حيث الواليد ماشي موسيقي. ربما ترانيم الموسيقى كاتشوش ليه السينيال ديال المورس.
المهم هاد جوج كاسيطات كانو سبيسيال! كانت فيهم روائع الموسيقى العالمية ولكن بعزف الساكسوفون.
اول موسيقى سمعاتها ودنيا هي موسيقى الساكسوفون. آه غريبة..
وأنا فهاد السن ديال دابا مازال الاغاني ديال هادوك جوج كاسيطات كايدورو ليا فراسي. مازال كانتذكر كنت منين كانسمع لشي اغنية (موسيقى صامتة في الحقيقة) كنتخيل ليها سيناريو وقصة فخيالي قبل مايكون شي حاجة سميتها الفيديو كليب.
الواليد كان حابس علينا الخروج من غير المشية للمدرسة. لذلك كنت كاننسج عوالم وافلام كانعمر بيها وقتي بفضل هاد جوج كاسيطات.
هاد التجربة الطفولية كونات عندي حس ديال الاستماع للموسيقى لازمني طوال حياتي وخلا ودني طللع النيفو فالإختيارات ديالها.
منين كانسمع لسعد المجرد ولا آحمد شوقي دابا وغيرو من الكليكة ديال كانشرفو البلاد(يلعن لوموسيكسيال ديال بوك كاتشرف النم) كاضرني ودني وكانحس بالتشويش. كانحس بللي هاد الموسيقى وهاد الكلمات وهاد الريتمات المبتدلة والمتكررة والمملة بحال طفيليات كاتكاتر فوق شي طبسيل ديال الماكلة. الفرق هو ان الطفيليات خصها وقت طويل باش تتكاثر وهادو ليبلانا بيهم الله كايتكاترو فساعات. الوقت الذي يتطلبه بلوغ العدد الكافي من المشاهدات والجيمات في اليوتيب.
منين كاننتاقد هاد الناس وهاد((الفن)) ماشي كاندعي لفن آخر كلاص ديال الموسيقى الكلاسيكية او الساكسوفون ديال الكاصيطات دياولي.
لا كاندعي لواحد المينيموم ديال احترام الذوق وإحترام الفن. الناس برا كادير اغاني كوميرصيال وكاتكون رائعة!!
ناس في المغرب مامشهورينش كادير موسيقى رائعة!!
شحال من واحد سمع لأغنية سعد المجرد وبقا مرفوع فالسماء حتى سالات وفي الأخير قال : واو ?
فوقاش اصلا اخر مرة سمعتي اغنية مغربية وقلتي من نيتك #واو ?
الفن والموسيقى ماشي شي حاجة معجزة راه كاينين مواهب وكاين ليحط ليك اغنية رائعة فنياً ,عطيه غير جوان والكالم والكثير من التشجيع النفسي.
شي مرات كانقول بللي السبب وراء استفحال هاد الاغاني وهاد الفن الركيك هو الذوق ديال المغاربة! هادا هو الجواب البسيط ولي كايتبادر للأذهان منين كانبغيو نلقاو مذنب وبسرعة... المغاربة مكلخين.. المغاربة ماكايعرفوش.. كحل الراس ماكايفهمش..
ولكن بعد مافكرت لقيت بللي ماشي هادا هو السبب.
هناك سببين في نظري:
الاول بسيط وهو انه المغربي البسيط غادي يسمع للحاجة ليكاينة فالسوق.
السبب الثاني هو اكثر تعقيدا. وهو ان المغربي كايقلب على الاغنية ليدارت البوز فقط buzz وخصوصا الاغنية ليتشهرات فدول أخرى! او المغني ليتشهر فدول اخرى. هادا جاي من الميل ديالنا لتشجيع او بالأحرى من الإشهار بكل ما هو مغربي في الخارج. هادشي جاي ايضا من عقدة نقص ربما ليكاتخلينا نتخيلو ان الناس ديال برا وديال الخليج مثلا اكثر قدرة على التمييز بين ماهو يستاهل وبين لي مايستاهلش.
هاد السبب الثاني داخلين فيه بزاف ديال العوامل خصوصا العامل الهوايتي ديال المغاربة ولكن هادا موضوع كبير وطويل.
خلاصة الموضوع في نظري هي شيء بسيط. بما أن الفن كايخضع بالدرجة الاولى لقانون الربح المادي ,فالمستهلك هو ليكايطلع النجوم. يلا قاطع كل ماهو ذون المستوى غادي يولي من الضروري على الفنان ودور الإنتاج أنها تهز النيفو.
إعداد : أدرار طارق
