سلسلة الجحيم - l'enfer (الجزء الأول)

السؤال الفلسفي لي محير كولشي هو اشنو غيكون ما بعد الموت؟ نفس السؤال لي حير تا الإغريق و خلاهم احطو أساطير في هذا الصدد.

الجحيم او كلمة الجحيم هي ماكاتعنيش فورسيمون المكان لي كيتعذبو فيه ناس في الأسطورة الإغريقية و الرومانية بل هو المكان لي كيحوي أرواح الموتى ما بعد الموت و هي متمثلة في أشباح ضعيفة بلا احاسيس كيتحاكم على دكشي لي دارت، يعني ما بقيناش كنهضرو  على الجحيم بل على مملكة الآلهة هاديس و مراتو بيرسيفون محروصة بكلب عندو ثلاثة ريوس.

هاد الأرواح كتحاول تقنع الآلهة باش ارجعها للحياة عن طريق إراقة الدماء، هضر افلاطون او واحد الديانة اغريقة سميتها لورفسزم على هاد الصورة الاخروية بتفاصيل.
تقال بلي ديك لبلاصة فيها شبه محكمة بحيث جوج من وليدات زيوس الآلهة المقودة في الأسطورة الإغريقية هوما لي كيقررو مصير الأرواح، واش غتمشي ل إليسيون لي هي جزيرة الخالدين فيها الحياة الأبدية كلها سعادة و نعيم(الجنة)، ولا لتارتاروس لي هو سجن تحت الأرض فيه ناس لي تمردوا ضد زيوس(جهنم).

هاديس فيها تفاصيل كثر من هادي و لي مهضرتش عليها، هاد المكان لي كيعطي صورة مقربة لجنة و جحيم لي تكونات بقرب ثلاثة قرون قبل الميلاد عند الاغريق او لي أثرت في الأديان بقوة.

بحت/إعداد : جيهان صويب