بقلم : زكرياء بلقاسم
هاكا ولا رقصة الهاكا haka هي رقصة تقليدية ديال سكان نيوزيلاندا الأصليين، لي هوما الماوريين، ولي كايكون فيها استعراض جسدي فيه ضرب للارجل والأيادي، كاشارة للاستعداد، والتهييء ديال الجسم للقتال، هاذ الرقصة هاذي كانو تايشطحوها الماوريين أمام الأعداء ديالهم قبل الحرب للترهيب، وللاستعداد، وباش يبينو الشجاعة والقوة ديالهم، كيما كاتستعمل للترحيب بالضيوف المهمين، الحفلات والجنائز، كإشارة منهم للولاء والاحترام والتقدير، والفرحة.
باش ترقص رقصة الهاكا خاصك اولا تخرج عينيك ولسانك، وتغني الأناشيد بصوت مرتفع بالموازاة مع ضرب الأرجل مع الأرض وحركات عنيفة باليد تادل على القوة.
بحالها بحال گاع الرقصات الهاكا أيضا فيها انواع وربما اهم هاذ الأنواع نذكرو : فاكاتو وايواي، توتو نغاراهو، و البيروبيرو لي هي رقصة كانو كايديروها قبل المعركة باش يستحضرو إله الحرب والقتال.
بينما توتو نغاراهو فهي رقصة لي كاتأدى بنفس الشكل ديال البيروبيرو مع بعض الاختلافات، والهدف منها هو الترحم على الأموات فالجنائز.
اشهر هاكا ولي كانعرفوها كاملين هي الهاكا كا ماتي لي تايديرها منتخب نيوزيلندا للريگبي قبل مايخوض أي مبارات، باش يرهب الفريق الآخر ويستاعد نفسيا لخوض المبارات، بحيث انه منذ 1905 وهوما تايشطحو هاذ الرقصة فالملعب.
كمعلومة اضافية : الرقصة قديما ماكاياديوهاش النساء ولكن حاليا ولا كولشي كايديرها، منين بانت الهاكا الحديثة.
