بزاف فيكم لي سولوني على الكتوبة لي يبداو بيهم باش يقدرو ينميو راسهم, داكشي علاش فكرت علاش لما نكتبش ليكم لائحة ديال الكتب لي خاصكم تقراوهم ولابد باش تنميو راسكم, مع تعليق بسيط على كل كتاب, باش هكذا تاخدو فكرة عليه قبل ماتقراوه, وتقدرو تنميو راسكم, باش من هنا القدام مايبقاش عندكم مشكل.
-الكتاب رقم واحد : أنت !
أول كتاب تايخصك تقراه هو نتا, قرا راسك, وعرف المشكل لي عندك فين كاين, تصالح مع راسك, وقوليه هاذي خايبة فيك خاصك تبدلها وهاذي زوينة فيك خاصك تخليها, ماتبقاش تكذب على راسك, إذا كان عندك مشكل فالثقة كتبو فورقة, ودير حداه لائحة من المشاكل لي تاتعانيها, لائحة ديال الحوايج الخايبين لي راك باغي تبدلهم وماشي ناوي تبدلهم, حيتاش ماكاينش وقت للنيات, دابا وقت التغيير.
الكتاب الثاني : قوة التفكير الإيجابي
علاش هاذ الكتاب, حيتاش الأغلبية ديال لمشاكل ديالنا واقفة على مشكل واحد لي هو الثقة فالنفس وعلاقتنا بالغير, يعني كيفما كانت المشاكل ديالنا فأكيد أنها مشاكل مرتابطة بالآخر, دونك هاذ الكتاب لي الصاحب ديالو هو نورمان فينيسينت بيل, كاتب مشهور صاحب مدرسة التنمية البشرية العصرية إذا بغينا نفخو فيه شوية, واخا يستاهل كتر ككاتب فهاذ المجال, الكتاب تايخليك بطق عملية تبني علاقات جداد مع الناس, بحيث تايوضع النقط على الحروف العارية من النقط, لي ذكرناها من قبل ولي هي الثقة فالنفس إلخ, هذا بلا ماندويو على مجال العمل, والبيزنيس, لي تايسلط عليه الضور, باختصار هذا كتاب تايركز على فكرة التفاءل, وتايخصك تقراه, كثاني خطوة من بعد ما تقرا ذاتك وتصالح معاها.
الكتاب الثالث : لا تهتم بصغائر الأمور
كتاب رائع من تأليف ريتشارد كارلسون, تايخليك تركز على النجاح, والهدف ديالك, بطريقة عملية كاتجلا فكيفاش أنك تفرق ما بين الحوايج المهمة والحوايج لي غادي تشتت انتباهك إذا بغينا نقولو على الهدف ديالك, ولي تايسميها : ضوضاء في النظام.
الكتاب ماشي مداد على ورق بحال الكتب لي والفنا نقراوهم ونشوفوهم فالمكتبات, وإنما كتاب عندو حمولة علمية, بحيث تايهضر فأمور يمكن تطبيقها, وممكن فعلا أنها تقودك للهدف ديالك وتنجح فيه, دونك هاذ الكتاب خاصك تقراه من مورا الكتابين السالف ذكرهما باش تركز على الهدف لي بنيتيه من خلال قراءتهما وتحققو.
الكتاب الرابع : العادات السبع للأشخص الأكثر فاعلية
فايت ليك شفتي هاذ الكتاب فالمكتبة وماديتيهاش فيه؟ دابا جات الوقيتة باش تقراه, لأنه بعدما عرفتي الأهداف ديالك وحددتيها من خلال أول كتابين لي هوما -نتا وقوة التفكير الإيجابي- وركزتي انتباهك على هاذ الأهداف لي حددتي من بعدما قريتي كتاب لا تهتم بصغائر الأمور جا الوقت باش تقرا العادات السبع للأشخاص الأكثر فاعلية لي كتبو ستيفن كوفي باش تعرف كيفاش تحقق الأهداف لي سطرتيهم.
الكتاب الخامس : عقل جديد كامل.. لماذا سيحكم المبدعون العالم
ألوغ بعدما غاتسالي الكتب لي قلت ليك تقراهم ولي أنا ثايق أنك غاتقراهم جا الوقت باش تقرا هاذ الكتاب الرائع, لي كتبو لينا دانيال إتش بينك, باش ترمم داك العقل لي عندك, وتردو جديد, باش يستامر فالإبداع ويستامر فالعطاء ديالو, الكتاب فعلا كتاب زوين بلحق غادي يخصك ضروري تكونسونطرا معاه, وتقراه بتأن, حيت فيه بزاف ديال المعلومات الرائعة على العقل البشري, غاتخليك تعيش العصر, وتكون داك الإنسان الناجح لي تعبتي من أجلو.
تال هنا غادي نقوليكم بون شونس فالمسيرة ديالكم فالنجاح, داكشي علاش غادي نختاتم المقال ديالي بواحد المقولة لي زوينة فالكتاب الثالث ولي هو لاتهتم بصغائر الأمور : الضغوط ماهي إلا نوع من الأمراض العصبية, لكنها مقبولة اجتماعيا, وبالتالي ماتفورسيش على راسك كتر من اللازم.
أخيرا ماتنساش ترسل لينا رسالة فالموقع الالكتروني عبر خاصية إتصل بنا, وتقولينا التجربة ديالك قبل وبعد قراءة هاذ الكتب.
إعداد : زكرياء بلقاسم
