تخايلو معايا أش غايوقع إذا نقز البشر كامل, فدقة وحدة؟ سؤال تساءلناه شحال من مرة, وتساءلوه تا العلماء, وكتبات عليه مقالات مجموعة من المواقع العلمية بحال ScienceBlogs و موقع Straightdope لي غطاو بشكل كبير الناحية الكينماتيكية, بحيث الكينماتيكا هي فرع من فروع الميكانيك, ولكن ماقالوش لينا القصة كاملة.
دونك أجيو نتعرفو جميع على آشنو غايوقع إذا نقز البشر كامل فدقة وحدة :
أولا خليونا نتخايلو أن سكان العالم كاملين تم النقل ديالهم بطريقة ما إلا منطقة فالعالم.
وهاذ المنطقة خليونا نتخايلوها على سبيل المثال : جزيرة رود - Rhode Island.
كولشي دابا كاين فجزيرة رود, مستفين وتايستاعدو ينقزو. 1..2...3 أوووب كولشي نقز
حيتاش حنا ماتانسواو والو قدام الوزن ديال الأرض لي تايفوقنا بكتر من 10 ترليون مرة, ماغاديش نأثرو عليها بشكل فعلي, دابا نفتارضو أن المسافة بيننا وبين الأرض فهاذ التنقيزة هي نصف متر, الأرض هاذ الساعة إذا اعتابرناها صلبة واستاجبات مباشرة, فراه غاتكون كحازت لتحت بمسافة تقل عن عرض ذرة, فهاذ اللقطة فين هبطنا للأرض.
تقنيا, هاذ التنقيزة هاذي لي نقزنا نقلات بزاف ديال الطاقة للأرض, ولكن هاذ الطاقة هاذي تاتوزع على واحد المساحة كبيرة, وماغادي تخلي تا شي أثر من غير الأثر ديال رجلينا فالأرض, و واحد النبض خفيف ديال الضغط فقشرة القارة الأمريكية الشمالية, لي غايتبدد وخايخلي أثر صغير, الصوت ديال رجلينا منين قاسو الأرض غادي يخلي واحد الصوت مجهد لي غايستمر لعدة ثوان, واحد الشوية بدون سابق إنذار, الهواء غادي يولي ساكن, غادوز ثوان قليلة وغادي يبدا شي تا يشوف فشي, باستغراب.
كل واحد تايشوف فلاخر, شوفات ديال أشنو دابا؟ وشي واحد تايكح.
واحد فيهم جبد بورطابلو, بغا يصوني على شي عشيرو فالصف, ولكن الريزو ماكاينش, ثوان قليلة من موراه بنادم تا هو جبد بورطابلاتو, الريزو والو.. العالم كامل مافيهش الريزو, لاحقاش السلوكة تحت الأرض تعرضو لواحد الحمل ماموالفينوش, خارج جزيرة رود الآليات كاملين بداو تايتوقفو عن العمل بشكل تدريجي.
بنادم بدا تايفكر يرجع لبلادو صافي, سالات التجربة ماوقع والو, بغاو يرجعو لبلادهم, المطارات لي كاينين تماك قادرة تستوعب الآلاف ديال الناس.
وحتى السكك الحديدية والموانئ, الناس بداو تايغادروبقا مشكل واحد, خاصهم الماكلة والشراب, ناس بداو تايتخلعو, كل واحد فيهم فيه الجوع ومالاقيش ماياكل حيتاش داكشي لي كان فالمحلات سالا, السيارات بداو كايتشفرو, بنادم باغي يعلق, كتر من مليون ونص ديال الطوموبيلات تسرقو, أزمة خانقة فالشارع, يمكن نعتابروها أكبر أزمة ديال السيارات دوز على كوكبنا, حيتاش السيارات عامرين ببنادم والزحام فالشارع, ناس قلال هوما لي محظوظين حيتاش مشاو تايضبرو على ريوسهم فالزناقي المهجورة.
يقدرو شي وحدين يوصلو حتى لنيويورك ولا بوسطن بسياراتهم, ولكن غايتسالا ليهم ليسونس, الشيء لي غايخليهم يسرقو سيارة أخرى فيها ليسونس, حيتاش سطاسيون ماخدامش, وحيتاش ماكاينش لي يوقفك, حيت حتى البوليس جاو ينقزو معاك.
من بعد شي ناس غايوصلو لجنوب ماساشوستس و كونيكتكت, وماشي بالضرورة تكون اللغة باش تاتهضر هي اللغة باش تايهضرو لوخرين, تاحد ماتايعرف لاخر, وتاحد ماتايعرف المنطقة, الروينة غاتنوض وغايبدا العنف حيتاش كولشي فيه جوع والعطش.
هكذا غادي تولي جزيوة رود, مقبرة ديال مليارات الناس, مورا أسبيع قليلة, ومن بعد مورا هاذ السيناريو الكارثي, غادي ينتاشرو حول العالم دوك لي نجاو من الموت, ويبداو يبنيو حضارات جداد, العدد ديال الانسان ولا قليل, وماتو بزاف, والأرض ما وقع ليها والو.
حيت مورا هاذشي كامل, مازالا الأرض تادور فنفس المدار ديالها, من قبل ماينقز بنادم كاع, ولكن ماشي مشكل المهم أننا عرفنا شنو وقع.
بحت/ترجمة/إعداد : زكرياء بلقاسم
