مجتمع بانوبتيكي :
ميشيل فوكو كيأمن بواحد ستون تاع نيتشه لي هو إرادة القوة ولي هو المنبع أي سلوك إنساني ولي كتكون موراه رغبة من أجل السيطرة و فرض الهيمنة و فوكو عطى مثال بالمجهودات لي دارت فالقرن 19 لإصلاح العقابي كان فالأساس تاعها رغبة فالمزيد من السيطرة على الأفراد بحال سجن البانوبتيكون لأسسو جيرمي بنثام،هاد البانوبتيكون هو واحد التصميم ديال واحد الحبس على شكل دائري و فيه واحد البرج لمراقبة فالوسط فين كاين واحد الحارس،يعني هنا كيقدر الحارس يشوف كاع الحباسة،بالتالي كيولي السجين ديما منكري من الحارس حيتاش كيقول فراسو بلي الحارس ديما حاضيه و هاكا كيولي السجين كضبط نفسو و سلوك ديالو مع الوقت بدون أي حارس هادشي كتحاول الحكومات توضفو حتى فالمجتمع من أجل ضبط الأفراد و هادشي لي كخلينا عايشين فواحد المجتمع كما كقول فوكو لي الواحد فيه ماكيحتاجش لشي قوة قمعية يكفي هاد بانوبتيكون فقط تزرع بعض الأفكار فدماغو و غادي يحكم فراسو و باش نتعمقو فهاد الفكرة ناخذو أمثلة من الواقع،البانوبتيكون داخل فالحياة ديال أي شخص كيفما كان،مثلا كتهدر مع والديك على الحسن الثاني و كتبدا تعاود لهم على الجرائم تاعو هما غير بوحدهم كيسكتوك حيتاش خايفين ليسمع لهدرة شيحد و إجيو إيديوك ههه كتلقاهم عياشة بالفطرة ههه سبحان البانوبتيكون و هاكدا كيولي الواحد كيضبط سلوك ديالو بدون قوة قمعية من الدولة،كذلك الدين هو كيمارس هاد panopticon مثلا كتلقا من الصغر كيأدلجوك بالمفاهيم جهنام،العذاب و السيئات فين ما كادير شي لعبة كيبداو عليك غادي يعذبك الله فجهنم و كدا و مع الوقت الواحد كيتم غادي و ياخذ قواعد كيسير بيها حياتوا مبنية على البانوبتيكون هكاك علاش الواحد خاص إوعى بشي مسائل مهمة باش إتمرد على هاد بانوبتيكون لي كيسير ليه حياتو.
بحت/إعداد : سعيد هموني
