رأس السنة قرب, والحب ديالك خاصك تبين ليها بلي راك مانسيتيهاش, وتجيب ليها كادو, ولكن شنوهو الكادو لي نجيب ليها؟
بزاف ديال الدراري تايطيحو فهاذ المشكل وماتايعرفوش شنو يجيبو للحب ديالهم كهدية ديال رأس السنة الشيء لي تايخليهم يطيحو فمواقف خايبة, كاتأدي بعض المرات لأنهم يتفاداو يتلاقاو معاها ديك الليلة, باش ما يعطيش كادو, ماشي حيتاش ماباغيش ولكن حيتاش ماعارفش أنواع الكادوات لي يقدر يعطي لدرية ديالو, ويخليها فخورة بيه وفرحانة, دونك فهاذ المقال غانعطيكم كادوات لي ممكن تعطيهم للصاطة ديالك ولكن قبل مانقوليه شنو هوما الكادوات لي تقدر تعطيها بغيت نقوليك أولا أن الكادو ماشي بالضرورة يكون مكلف, بل المهم هو الدلالة لي تايحملها دونك أول حاجة خاص نعرفوها هي أن الكادو ماشي هو شحال ساوي كثمن, وإنما شحال ساوي كحمولة دلالية...
دابا نشوفو الكادوات لي تقدر تعطيهم للحب ديالك وهنا ممكن نفرقو ما بين جوج أنواع ديال الكادوات :
الكادوات الملموسة : -الكوفر ديال الوسادة يقدر يكون كادو زوين, بشرط أنه يكون فيه شي حاجة لي تاتفكركم فبعضياتكم, بالاضافة لهادشي الكوفر ديال الوسادة كاتشوف فيه الحب ديالها, وكاتشم فيه ريحتو فالليل.
-ألبوم ديال التصاور فيه تصاوركم مع بعض الملاحظات الطريفة لي وقعات ليكم تقدر تكون أفضل كادو, لي ماغايكلفكش بزاف, ولكن غادي يخلي بزاف فقلبها.
-شري ليها كتاب إذا كانت من هواة الكتب, كتاب قديم غابر او كاتب كايعجبها وكتاب بغات تشريه هو كادو لي غادي يخليها فخورة بيك وغادي يخلي صورتك تكبر فينيعا.
الكادوات الغير ملموسة : -دير داكشي لي كاتبغيك ديرو ونتا ماكاتبغيش ديرو, لنفرض مثلا أنك كاتكمي وهي ديما تاتقوليك قطع ونتا ماعلا بالكش, أنك تقطع السجائر من البوناني فخطرة يقدر يكون أحسن كادو تعطيه ليها.
-ديها لشي كونسير, ولا فيستيفال فين ممكن تنشطو وتفوجو وتدوزو ليلة زوينة, أولا ليلة فالبحر كافياها تعقل عليها حياتها كاملة.
-خرج معاها لبلايص لي كاتبغي تمشي ليهم هي وماتنساش بلي غير أنها تلقا راحتها معاك ديك الليلة بحد ذاتو كادو غايعجبها.
كيما قلنا الكادو ماشي هو تكلف راسك, حيتاش أحسن كادو هو لي كايقيس القلب, داكشي علاش بغيت نقوليك أنك إذا كنت مزلوط وماعندكش فلوس باش تشري كادو, وماكاينش البحر فمدينتك, وماكاين تا كونصير أو فيستيفال, يكفي أن الكادو ديالك يكون هو : كانبغيك.
إعداد : كوتش زكرياء
