ستة مائة يوم من العزلة -الجزء الثالث-

دوزنا ديك الليلة فجحيم, كان البرد واعر او قاصح كتحس بيه طالع ليك مع الجلد تاكايوصل لسنان او تايبداو يتراقصو على الانغام الموغادورية, لي طمحنا نوصلو ليها الغد ليه فالصبح, او وصلنا بالفعل عن طريق سطيبا.

من بعد ما وصلنا لصويرة حسينا بواحد الانجاز زوين وصلنا مافاهمين والو, اوك هاحنا وصلنا لصويرة اجي ندورو, درنا مزيان, باب دكالة, القصيبة, الزاوية, احياء مدينة الصويرة لي فاش كتكون كادور فيهم كتحس براسك كادور وصط لوحة فنية لقيتي فيها راحتك, كاندورو فمدينة الحب و السلام, و البهجة, مدينة الانا المختلف. بالمناسبة صويرة عندها سمية اخرى لي هي مدينة الرياح. الشيء لي نبهنا اننا خاصنا نخويوها دغية لايصدق واقع لينا ما وقع لينا فتغازوت. اوك شدينا الطريق بعدنا على الصويرة بزاف, تولينا فالطريق الوطنية الرابطة مابين الصويرة و مراكش, اي الرقم 19. بييس داكشي زوين حتا للحظة فين جلسنا نستارحو حيدنا صيكان حطيناهم فجنب الطريق او جلسنا حداهم حيدنا تا صبابطنا باش نرتاحو, بصراحة رجلينا مشاو مابقاوش كيما كانو حمرين بزاف سخان فاش كاندلكهم تانحس بالراحة لي سالات فاش هبطو لينا مجموعة من الدراري لي كان العدد ديالهم بزا ف شي 9, اعتمدت داكشي لي علماتني الزنقة او انا لي بديت الهدرة : " سلام واش ادراري" واحد فيهم كان القدام جبد جنوي او جاوبني بالسلام. انا :"كتحطب بهاداك الجنوي؟" هو :"لا كانكريسيو بيه" انا :"اه كتحطبو بيه بنادم." هو "هانتا فهمتي, منين نتوما ادراري ؟" جاوبت بالعيون. "او هو يقول صاحبك جمدات فيه الخرية" ضحكت تانا او هو يقول لينا غي ضاحكين تهلاو ادراري او مشاو.

من بعد بقينا كنتسناو او والو تا واحد ماوقف لينا تا وقفات ليا الحفلة كاملة بالاتصال لي حتم عليا نرجع فحالي بحكم انها شافت واحد لفوطو ديالنا غاديين, صافي هي هاديك رجعنا فحالاتنا او مقررين ان المرة الجاية انه غاتكون حسن, ماشي بزاف تا جات هاد المرة , شهرين مورا الصويرة قررنا نطلعو لتوبقال من بعدما درسنا البلان مزيان او طرحنا كاع المشاكل لي يقدرو يوقفو فطريقنا. اشنو غاندير مع الواليدة ؟ اشنو غاندير مع المعهد ؟ اما لافاك ماعنديش معاها مشكل, اشنو غاندير باش نحظر الفلوس ؟

إعداد : ر.م أمين