سلسلة تعلم لغة البرمجة C -تقديم-

أولا قبل مانبداو السلسلة ديالنا لي غاتكون على لغة البرمجة C ولي غاتكون على شكل فيديوهات, أجيو بعدا نعرفو أشنو هي C ؟

أولا C كيما سبق الذكر هي لغة من لغات البرمجة, ولكن قبل ماتنعمقو فيها ونعرفو اشناهيا هاد اللغة, تايخصنا نرجعو بعدا شوية للوراء, وبالضبط الوقيتة فاش تصاوبات أي لتاريخ ديالها:

دونك, لغة البرمجة C هي واحد اللغة لي بدا العمل بها تقريبا فالفترة الزمنية لي جات ما بين 1969 و 1972 في مختبرات "بيل" بحيث تم التصميم ديالها على يد كل من كن تومسون، بريان كيرنيغان، و دينيس ريتشي. و تسمات "C" حيتاش جزء كبير منها مقتبس من لغة البرمجة " B" لي كات قبل منها و للتذكير والتوضيح فراه "C" ماشي هي اول لغة برمجة, حيتاش كانو لغات بزاف قبل منها بحال لغة الأسمبلي أو التجميع, ولكن معقدين بزاف بحيث تاتكون قريبة للحاسوب أي تايفهمها بشكل جيد, ولكن صعيبة على الانسان, الشيء لي فتح المجال ل "C" لي تاتعتابر من اللغات العالية المستوى, أي قريبة للإنسان, باش تتعتبر الاكثر انتشارا و اتقانا للبساطة ديالها, بحيث بها تم انشاء الانظمة الاساسية لنظام التشغل لينكس و منساوش باللي هاذ اللغة لقات شعبية كبيرة عند محترفي البرمجة لانها كتعتبر اساس جميع اللغات الاخرى المطورة بحال ""++C"" و ايضا " Java " و "#C " لي كان اخر تطزير لها سنة 2011.

دونك لغة C هي لغة برمجة, لي تانستعملوها لبرمجة النظم System programming وأنظمة التشغيل Operating systems ولي تصاوبات على يد كن تومسون, بريان كيرنيغان ودينيس ريتشي, شي ناس تايعتابروها من اللغات المتوسطة المستوى,حيتاش كاتحاكي لغة الانسان شوية, وهي لغة لي مستقلة على البنية الصلبة للحاسوب.

دابا منين عرفنا بعجالة التاريخ ديال C وعرفنا أشنو هي هاذ اللغة, ولاش تاتصلاح, تايبقا وتعرفو شنو ممكن نديرو بيها, وكيفاش نوليو تانعرفو نخدمو بيها؟ هاذ الأسئلة كاملة غادي نجاوب عليها فالأجزاء المتبقية من السلسلة, لي غاتكون على شكل فيديوهات, باش هكذا تحتارفوها.

إعداد : أيمن زراري