كلنا بغينا نكونو اشخاص مميزين وسط صحابنا .. ومحبوبين ، او فالغالب باش نكسبو المحبة دالناس تنحاولو نعبروا على اهتمامنا بيهم او العناية بهم .. ولكن هدشي مكافيش حيت كاين بزاف دالصفات لي تنديروهم بلا منحسوا تخليو الناس يتجنبونا او الاصدقاء ليدايرين بينا ميبقاوش يحملونا .. هاد الأشياء تنحصر فهاد الصفات .. لكانت فيك حاول تبدلها !!
أول حاجا الانانية :
مكاينش شي حد لي متعجبوش راسو طبعا .. ومكاينش شي حد لي متلاقاش مع ناس اهم حاجا عندهم هي راسهم .. تتهدر غا على راسك ، ومسوقكش ف ليدايرين بيك .. المهم راحتك هي لولة ، وتقدر تلقا هادشي غا فالقسم لي تتقرا فيه واحد شخص لي ديما تيهدر بانانية ومسوقوش فالزملاء ليمعاه ، او لايعيرهم اي اهتمام .. اوا اصديقي الا كنتي من هاد نوع حاول تبدل .. را فالغالب الشخص الاناني تيكون غير مرغوب.
ثاني حاجا الوجه العدواني :
كتلاقا مع صحابك مثلا ، وكتستقبلهم بوجه عدواني او مغوبش .. وتقدر دخل معاهم فصراعات لأبسط الحوايج بحالا راهم اعداء .. تكتولي مصدر ازعاج ليهم .. ويلا شفتيهم كيتجاهلوك ويبعدو عليك ، عرف راك تماديتي.
تالث حاجا التركيز على المظهر الخارجي فقط :
اخويا اختِ را التركيز على الجمال الخارجي وتجاهل المكنون الداخلي تيخليك شخص فارغ او جاهل .. الإعجاب بجمالك الخارجي مدايمش ديما .. فاي نقاش بسيط وسط مجموعة من صحابك تقدر تبان جاهل لا يفقه شيئاً .. تقدر تبغي تطلب غا شي حاجا من عند شي حد وغتلقا راسك تتهدر باسلوب زنقاوي .. تقدر تكون زوين ولكن غير متسامح .. تتضرب حطات واعرين ولكن مكتعرفش تهدر .. ثقْ بيا ماشي كاع الناس مهتمين بمظهرك الخارجي.
رابع حاجا واش نتا من هادوك لي كيبغيو يكونو ديما الأفضل؟
تتبغي ديما تكون لول فاي حاجا .. ديما كتشوف راسك نتا الأفضل .. لالا هاد الحاجا متتكونش ديما مزيانا .. ديما عطي اهتمام بصحابك .. فمثلا واحد صاحبك حقق واحد الهدف او تعلم لغة او شرا شيحاجا .. متقولش ليه " نتاا يلاا درتي هاد لبلان وانا عام هادي باش درتو " .. لا بل بدل دوك العبارات دالافتخار والاعجاب بالنفس .. بعبارات تحفيز .. " بصحتك اخويا ، مزياان .. الا بغيتي شيحاجا مساعدة انا هنا ".
خامس حاجا واش نتا كتشك ديما فالقيمة ديالك او الاهمية عند ناس ؟ واش ملي تخرجو زوج صحابك بلا ميعلموك تاتبقا موسوس وتتاخد الامر بجدية ؟ .. هاد الوسواس تخليك ديما كتعيش ممرتاحش .. تجاوز هادشي .. وصحابك را تبقاو صحابك .. خلق عذر ربما عرفوك ممساليش او او .. ومتعيش ف دوامة واش انا عزيز على هاد شخص او لالا.
سادس حاجا الميل الى السيطرة :
ملي تجمع نتا وصحابك مثلا على شي مشروع او اي شيئ .. متحاولش دائما تبان داك شخص لي تبغي يفرض راسو وترفض اراء الغير فقط لانها لاتوافقك ، وتبان نتا شخص المسيطر وليتعطي الاوامر .. لا متنساش ان صحابك عندهم الحق انهم يبديو برأيهم واقتراحاتهم.
سابع حاجا الصدق :
بزاف دالناس تيتجنبوهم الاشخاص غير حيت هما مصادقينش .. او فيهم كثرة الكذوب والعياقة .. او لي تيكذبو حتى فالاعتراف بالمشاعر .. هداك عزيز عليا ليوم .. ومع صاحبو لاخر يقول متنحملوش .. وفيه كثرة تخلويض ، ديما كون صادق مع صحابك وتعامل بكل شفافية .. وغتلقا راسك محبوب بين ناس ليدايرين بيك.
ثامن حاجا لكنتي من دوك الاشخاص لي عزيز عليهم يسخروا من الاخرين :
او تحرج احد صاحبك وسط مجموعة من الاشخاص .. فهاد الحاجا كتسما بالوقاحة او الاهانة .. انك ترمي تعليقات ساخرة فوجه شخص ما باش تثير الانتباه وضحك ناس .. هنا تقدر تولي شخص غير مرغوب .. شيمرات وخا كتضحك دوك الناس ولكن تاهما ايوليو يتجنبو يمشيو معاك.
تاسع حاجا اصدقائي انت شخص لا يعتمد عليه :
علاش .. حيت ولفتي الناس هما ليديرو لك كلشي .. كيجي عندك صاحبك يطلب منك شيحاجا ولكن نتا ديما مشغول .. ديما تتعطي اعذار فاش تطلب منك شي حد شي مساعدة .. لا بلعكس انت لكنتي عارف شيحاجا وعارف ان شخص ما باغي لي يعاونو .. عرض المساعدة قبل ميطلبها.
اخر شيئ انت شخص سلبي :
لا منديروش .. لا منمشيوش .. لامووحال ..الخ من عبارات السلبية ، خاصك تعرف ان الناس تعجبها داك الشخص المتفائل او الشجاع ولي تزرع فيهم التفائل ويشجعهم على فعل اي شيئ وعندو ثقة فنفسو وايضا تيوجه هاد الثقة لصحابو..
لكنتِ كتميز بهادشي حاول تغيرو .. ولكانت فيك احد من هاد الصفات ومتحملوكش صحابك .. راك عرفتِ السبب ، وصحاب دبصح راه هما لي غيواجهوك بأحد من هاد الصفات .. تاحد مكامل .. وكلنا فينا شيحاجا من هاد الحوايج ..
الى اللقاء ف موضوع اخر.
إعداد : Abd Elmotalib
