6 ديال النصائح إلا بغيتي كولشي يولي يحتارمك:
أول حاجة خاصك تعرف هي أن الإحترام راه ماشي حق ديالك ولا مفروض على شي واحد و لكن الإحترام ديال الناس هو واحد الحاجة خاصك نتا تفرضها على البشر (حيت بنادم ماكايفهمش كرو).
1) تهلا ف لوك ديالك (المظهر)،حيت المظهر ديالك كايعطي رسالة لهاداك كحل راس بلي راك ماشي دمدومة،نتا لابس سنضالة مهنشرة و شعرك شهر ما قاسوش الما،و كيطما مخيطة من جناب،فمك صفر فيه ريحا ديال البطبوط،عادي غادي تضسر عليك بو قلوة و حتى الموسطاشات ما يحتارمكوش (إسثناء:إلا كنتي مجرم،حباس راه كولشي يحترامك غير خرج عريان مي ديما غادين يبعدو منك).
2) دافع على داكشي لي كاتأمن بيه (المبادئ ديالك و تا تا تا...)،خاصك تكون مستقل ف أفكارك ماشي لي قالها القطيع تقول أه كاينة،تا واخا تكون نفسك ف ...،أنا ماكايعجبنيش هاد ستيل،أنا ما بغيتش نمشي معاكوم،أنا مافياش هاد الفعايل،من اللخر.
3) هضر نقي،قول عافاك فاش تبغي طلب شي حاجة،و قول شكرا فاش تقضي حاجتك،ما تعيقش ب تخسار الهضرة،حيت غادي تبان مكلخ و جاهل (واخا يكون راسك عامر).
4) أحتارم نتا بنادم،ماتضحكش على بنادم منين جاي،ولا شنو لابس،ولا كيداير ف وجهو،ما تدويش لبنادم ف ضهرو،إحترم تحترم (قانون التبادلية إلا بقيتو عاقلين).
5) كون راجل ف كلمتك،إلا قلتي غادي ندير شي حاجة ديرها ولا ريح من الطيران الخاوي.
6) حاول تدير جهدك كامل ف أي حاجة بغيتي ديرها،إلا مادرتيهاش مايبقاش فيك الحال،المهم ما خلتيش فيها.
بقلم : Mehdi Moutaouakil
