شنو هي الكلبية أو Cynicism؟

الكلبية أو السنيسيزم هو مذهب فلسفي أسسوا الفيلسوف أنتيستنيس, حيث اختالفو المؤرخين فسبب التسمية, بحيث كاين لي قال أن السينيسيزم هو اسم مستمد من سينوسارغس, ولي هو مكان فأثينا ولي تايتعتابر هو أول مكان يتجمعو فيه الكلبيين, أو المتبعين لمذهب السينيسيزم, بينما تايقول البعض أن سبب التسمية هو الصفات ديال الكلبيين لي كاتشبه لتصرفات ديال الكلاب, بحيث كاينبحوا فوجه المجتمع الفاسد, وتايعيشو عيشة ديال الكلاب,بلا مانساو أن سينيك هي كلمة اغريقية تاتعني كلب, ولعل أحسن مثال هو الفيلسوف الكلبي المتطرف ديوجين لي كان معروف عليه تاياكل الخبز البايت, وتاينعس فالطواليطات أو الأحواض كيما هو مذكور فالكتب التاريخية لي دوات عليه بحال قاموس ناثان الفلسفي, إضافة إلى أنه كان تايقول بصريح العبارة : اسمي ديوجين ولقبي كلب.

المهم ومافيه أن السينيسيزم أو الكلبية هو مبدأ لي تايأمن بالمبدأ القائل أن الفضيلة هي غاية الحياة وسر السعادة, ولي تايتعتابر مبدأ سقراطي الأصل, بحيث أن أنتيستيس مؤسس المذهب كان من أتباع سقراط, المهم أنهم تايعرفو الفضيلة على أنها هي المعرفة, وكل واحد من الكلبيين وطريقتو الخاصة باش يوصل لهاذ المعرفة, أولا هاذ المبدأ لي تايتعتابر مبدأ مهم فالفلسفة الكلبية.

من الأسباب لي كاتخلي الكلبيين يعيشو حياة تشبه حياة الكلب, هي اعتبارهم أن السعادة هي أنك تقدر تخلا على كولشي, وأن السعادة تاتحقق بأنك تعيش وفقا للطبيعة, وتخلى على أي حاجة زايدة على الحاجة, بمعنى آخر, أنه يكون عندك واحد الاكتفاء ذاتي, الكلبيين كانو تايعتابرو الفلسفة الكلبية أسلوب حياة, الشيء لي خلاهم أنهم يرفضو جميع العادات والأعراف والقوانين لي طرحها المجتمع, ونظرة الغير كاتبقى شي حاجة لي ماشي مهمة, وماتايتسوقوش ليها.

الكلبية ماشي هي ذيك الفكرة السائدة دابا ولي هي فكرة تحقيرية, بل الفلسفة الكلبية هي مذهب فلسفي تاينص على التخلي عن الأعراف العادات والتقاليد وما إلى ذلك, حيتاش هوما سباب ذيك الغريزة لي فالأخير تايتحكم عليها بالقمع, الشيء لي تايخليها تراكم وتخلينا نعتاقدو أن اشباع ذيك الغرائز هي السعادة, الشيء لي تايتعتابر فالمذهب الكلبي مستحيل نظرا لأنه وحسب اعتقادهم أنه لاوجود لسعادة دائمة, وأن السعادة هي مفهوم مؤقت كانعيشوه فترات متفرقة وقليلة, وبالتالي السعادة هي المعرفة, حيتاش المعرفة لا تنتهي, وبالتالي البحث عن المعرفة هو السسعادة التي لا تنتهي, زيد على هاذشي أن حياة الرفه والفلوس واللعاقة هي حياة تاتخليك ضعيف, بحيث أنه منين ماغايبقى عندك والو غاتجيك الحياة ديال الفقر ولي كايعتابروها الحياة على صورتها الحقيقية, غاتجيك صعيبة, وهنا ممكن نستحضرو المقولة ديال ديوجين : غير ذوك الناس لي ولفو حياة ناعمة هوما لي غايتذمرو منين يجربو العكس, بينما ذوك لي موالفين حياة بلا متع كايحسو بالسعادة منين تايبداو يسبو فمباهج الحياة. 

إعداد : زكرياء بلقاسم