البراغماتية،PRAGMATISM سماوها العرب بالعملانية،العملية،النفعية إلخ...مذهب فلسفي سياسي تأسس سنة 1878 على يد فيلسوف أمريكي "Charles SANDERS"،و طوروها زوج الفلاسفة و حتا هما أمريكيان"John DEWEY"و"William JAMES".
المهم باش نجيو من الأخير و نشرحوها بشكل مبسط،كانلقاو وسط هاد الإسم كلمة براغما و كاتعني باليونانية العمل،يعني هاد المذهب كايآمن بحاجة وحدة وهي العمل،و كيربط حقيقة الأشياء بالمنفعة منها،تسنا شويا هانتا اتفهم،هاد المذهب كايقول اننا إيلا بغينا نتحققو من الأشياء واش صادقة و لا مزيفة نمشيو نشوفوها واش نافعة،داكشي علاش وليام جيمس المطور ديال هاد المذهب قال "الفكرة صادقة إذا كانت مفيدة"،غادي نعطي أمثلة فالأخير للتوضيح غير صبر.
بالنسبة للبراغماتية انه إيلا بغينا نتحققو من صحة أكبر نظريات الفلاسفة نشوفو واش ايلا طبقناها اتنفعنا بشي حاجة،ايلا نفعاتنا رآها صحيحة و إيلا مانفعاتناش ماعدنا مانديرو بيها،و أيضا كايأكد ويليام جيمس بأنه لا وجود لحقيقة ثابتة فالبراغماتية،فما هو نافع اليوم نقول عنه حقيقي،و قد يصبح غدا غير نافع و يفقد حقيقته و العكس صحيح،الشخص البراغماتي ماعندوش مبادئ لأنه اصلا لا وجود لمبادئ إنسانية فهاد المذهب،أي انه حين يتعلق الأمر بالمنفعة،تبطل كل المبادئ أمام هذه المصلحة،ممكن هاد الفلسفة كتافق مع "ميكيافيلي"من واحد الناحية.
الشخص البراغماتي السؤال اللي كاينطلق منو للحكم على حقيقة الأشياء هو "واش كاينة شي منفعة فهاد الشيء ؟ بغض النظر عن الطبيعة ديالو.
أمثلة من أجل التوضيح :الرشوة براغماتيا ماشي شي حاجة خايبة بل كيخاصها تكون لأنها نافعة دونك هنا كاتأكد ديك النظرية أنه لا وجود لمبادئ إنسانية فهاد المذهب المنفعة ثم المنفعة.
مثال آخر : مؤخرا كانت زيارات ملكية لدول إفريقيا جنوب الصحراء من بينها نيجيريا و اللي كاتعتابر واحدة من أعداء الوحدة الترابية للمغرب و رغم ذلك وقع المغرب إتفاقيات عديدة مع هذا البلد،علاش؟ حيت نيجيريا مقودة إقتصاديا(سير بحث على الإقتصاد ديالهم الهربة يا اخاه)،و بما انها قوية إقتصاديا دونك عندها سيادة و المغرب باغي يرجع للإتحاد الإفريقي،هاكا ايكون الملك ضرب عصفورين بحجر واحد الاستفادة إقتصاديا و الثاني شرا معرفة مع الرئيس النيجيري باش يتعاون معاه يرجع للإتحاد الإفريقي،و شكون عرف يقدر يساند المغرب من أجل إكمال وحدته الترابية،بالتالي فهاد الموقف المغرب طبق سياسة براغماتية.
بس: إيلا كانت عندك عداوة مع شي واحد و مختالف نتا وياه إيديولوجيا،ثقافيا،إجتماعيا،دينيا،و ماكينش ديلمو تاشي بوان كوماه بينك وبينو و لكن عندك مصلحة فيه تقدر تقصدو و تكون براغماتي،ما إن تنتهي المنفعة شريه فحالاتك.
*ملحوظة:هذا المقال لا يعبر عن آراء شخصية إنما هو فقط توضيح و بحث صغير درتو و بغيت نشاركو معاكم،نتمنى نكون وصلت المعلومة كما يجب،بغيت هاد المرة منين تسمع هاد المصطلح تعرفو شنو هو.
